Արմինֆո. "Bacon Holding" ՓԲԸ-ն ԵՄ-Հայաստան հիմնադրամից (EU-Armenia SME Fund), որը ղեկավարում է Amber Capital Armenia ներդրումային հիմնադրամը, ստացել է 6 մլն դոլար ՝ զարգացման համալիր ռազմավարությանն աջակցելու նպատակով: Այդ մասին հաղորդում է հիմնադրամի մամուլի ծառայությունը։ Նշվում է, որ հիմնադրամը ձեռք է բերել ընկերության կապիտալում փոքրամասնական բաժնեմաս, որի չափը չի հրապարակվում:
«Bacon Holding» ՓԲԸ-ը հանդիսանում է «Bacon Product» ՍՊԸ հոլդինգային ընկերության բաղկացուցիչ մասը, որը մսամթերքի և կիսաֆաբրիկատների առաջատար արտադրողներից մեկն է Հայաստանում: «Այս գործընկերությունը Bacon Product-ին տրամադրում է ինչպես կապիտալ, այնպես էլ ռազմավարական փորձաքննություն ՝ զարգացման հաջորդ փուլ անցնելու համար: Amber Capital-ի հետ մենք նպատակ ունենք խթանել աճը, ներկայացնել նոր արտադրատեսակներ եւ առավել ամրապնդել մեր դիրքերը հայկական շուկայում եւ արտերկրում ", - ասել է Bacon Product LLC ընկերության ղեկավար և սեփականատեր Պավլիկ Մարգարյանը:
Ներդրումները կուղղվեն համապարփակ զարգացման ռազմավարությանն աջակցմանը, որը կենտրոնացած է գործառնական արդիականացման ու ենթակառուցվածքների կատարելագործման վրա։ Առաջնահերթ ուղղություններից են արտադրական գործընթացների ավտոմատացումը եւ լոգիստիկ հնարավորությունների բարելավումը՝ ուղղված արդյունավետության, մասշտաբելիության եւ գործառնական կառավարման որակի բարձրացմանը։ Միաժամանակ ընկերությունը կզարգացնի արտադրանքի պորտֆելը եւ կամրապնդի իր առեւտրային հարթակը՝ ապահովելու շուկայի հետագա ընդլայնում, արտահանում, եւ երկարաժամկետ արժեքի ստեղծում։
Նշենք, որ հոլդինգի արտահանման հիմնական ուղղություններն են Ռուսաստանն ու Վրաստանը, որտեղ հոլդինգի արտադրանքը ներկայացված է նաև խոշոր ցանցային խանութներում:
Արմինֆո-ի մասնագետներին չի հաջողվել բաց աղբյուրներում գտնել ընկերության 2024 թվականի ֆինանսական հաշվետվությունը։ Սակայն, 2023 թվականի տվյալների համաձայն, ընկերության հաշվեկշռի արժույթը կազմել է 4,426,720 հազար ՀՀ դրամ, որից 1,116,165 հազար ՀՀ դրամը բաժին է ընկել ոչ ընթացիկ ակտիվներին, իսկ 3,310,555 հազար ՀՀ դրամը՝ ընթացիկ ակտիվներին։ Ընկերության պարտավորությունները կազմել են 3,813,774 հազար դրամ, 2,361,102 հազար դրամը բաժին է ընկել կրեդիտորական պարտավորություններին:
Ընկերության հասույթը 2023 թվականի վերջին կազմել է 7,238,286 հազար դրամ, համախառն շահույթը՝ 1,131,638 հազար դրամ։ Առևտրային ծախսերին ուղղվել է 405,074 հազար դրամ, կառավարչական ծախսերին՝ 394,758 հազար դրամ: Ֆինանսական ծախսերը (վճարման ենթակա տոկոսները) կազմել են 119,696 հազար դրամ, զուտ շահույթը' 90,909 հազար դրամ: Սակայն 2023 թվականի ավարտն ընկերությունն ամփոփել է ոչ բարձր ֆինանսական արդյունքով՝ 41,704 հազար ՀՀ դրամ ՝ 2022 թվականի 394,050 հազար ՀՀ դրամի դիմաց ։ 2023 թվականի վերջի դրությամբ ընկերության սեփական կապիտալը կազմել է 612,946 հազար ՀՀ դրամ։
Հիշեցնենք, որ Amber Capital Armenia-ի կողմից կառավարվող EU-Armenia SME Fund-ը մասնավոր ներդրումային հիմնադրամ է, որը Հայաստանում գործարկվել է 2020 թվականի հունվարին ՝ Եվրոպական միության (ԵՄ), Վերակառուցման և զարգացման եվրոպական բանկի (ՎԶԵԲ), Amundi-ACBA Asset Management-ի, Հրայր և Աննա Հովնանյան հիմնադրամի և Amber Capital ներդրումային թիմի ներդրումներով։ Հետագայում հիմնադրամը լրացուցիչ կապիտալ է ներգրավել T-squared Ampega Asset Management-ից, Նիդերլանդական ձեռներեցության զարգացման բանկից (FMO) եւ Հայաստանի կառավարությունից, ինչպես նաեւ մի շարք սփյուռքահայ ներդրողներից, ինչի արդյունքում ներգրավված կապիտալի ընդհանուր ծավալը հասել է 60 մլն դոլարի:
