Արմինֆո. 2027թ. հունիսի 1-ից Օմանի Սուլթանություն մսամթերքի ներկրման համար տնտեսավարողները պետք է ունենան «HALAL» մակնշման վկայականներ։ Այդ մասին հաղորդում է ՀՀ Սննդամթերքի անվտանգության տեսչական մարմնի (ՍԱՏՄ) մամուլի ծառայությունը։
«Հաշվի առնելով Հայաստանի Հանրապետության և Օմանի Սուլթանության միջև առևտրաշրջանառության խթանման կարևորությունը, ինչպես նաև օմանական կողմի ցուցաբերած հետաքրքրությունը հայկական գյուղատնտեսական ապրանքների, այդ թվում՝ մսամթերքի ներկրման նկատմամբ, իրազեկում ենք, որ 2027թ. հունիսի 1-ից մսամթերքի արտադրությամբ և արտահանմամբ զբաղվող հայաստանյան տնտեսվարողները Օմանի Սուլթանություն մսամթերքի ներկրման համար պետք է ունենան Օմանի սննդամթերքի անվտանգության և որակի կենտրոնի հավատարմագրած մարմինների կողմից տրված «HALAL» մակնշման վկայականներ», - ասվում է ՍԱՏՄ հաղորդագրությունում:
Նշենք, որ Հայաստանի Մաքսային ծառայության վերջին տվյալների համաձայն (2025թ. 1-ին կիսամյակ) Օմանը չկա Հայաստանի արտահանման շուկաների ցանկում։ Մինչդեռ, Օմանից Հայաստան ներկրվող ապրանքների մաքսային արժեքը կազմել է 309.2 հազար դոլար՝ տարեկան 18.8 տոկոս աճով։
