Արմինֆո.Կանաչ օրակարգի շրջանակներում ինչպես ԵՄ-ում, այնպես էլ Հայաստանում գործող կարգավորումները բավականին բյուրոկրատական են ։
«Հայաստանի կանաչ օրակարգ» համաժողովի ընթացքում նման կարծիք է հայտնել Հայաստանում ԵՄ ներկայացուցչության համագործակցության բաժնի ղեկավար Ֆրանկ Հեսը:
Նրա խոսքով ՝ գոյություն ունեցող նորմերը լուրջ բեռ են, հատկապես, փոքր բիզնեսի համար։ "Ինչպես Հայաստանին, այնպես էլ Եվրոպային անհրաժեշտ է ներդնել խելամիտ կարգավորումներ, որոնք միաժամանակ պաշտպանում են շրջակա միջավայրը եւ խթաններ ստեղծում բիզնեսի բնապահպանական պատասխանատվության բարձրացման համար", - նշել է Հեսը:
Մատնանշելով Հայաստանի բնապահպանական ոլորտում առկա բազմաթիվ մարտահրավերները՝ Հեսը տարակուսանք է հայտնել, որ գործող քաղաքական ուժերից ոչ մեկն իր նախընտրական քարոզարշավի շրջանակներում չի բարձրացնում շրջակա միջավայրի պահպանության հարցերը: «Ես ոչինչ չեմ լսել, ոչինչ չի հնչել։ Իսկ դա չափազանց կարեւոր հարց է», - ընդգծել է նա։
Իր հերթին՝ Հայաստանում Շվեդիայի Թագավորության դեսպան Պատրիկ Սվենսոնը նշել է, որ կանաչ օրակարգին անցումն այսօր անհրաժեշտություն է: Նա նշել է, որ դա կարևոր է ինչպես կլիմայի և բնապահպանության, այնպես էլ մրցակցային առավելությունների տեսանկյունից, քանի որ այս օրակարգի իրականացումն արագացնում է զարգացումը և նպաստում առաջադրված նպատակների իրագործմանը: «Մենք ՝ որպես երկիր, ցանկանում ենք գլոբալ առաջնորդ լինել շրջանաձև տնտեսության մեջ: Մենք ունենք մինչեւ 2040 թվականը արտանետումների կրճատման ռազմավարական ծրագիր, եւ Հայաստանը մեզ համար կարեւոր գործընկեր է", - ասել Է դիվանագետը։
Նա հավելել է, որ Շվեդիայի կողմից համագործակցության առաջնային ուղղություններն այսօր ժողովրդավարական բարեփոխումներին աջակցելն ու Հայաստանի մեկուսացվածության մակարդակի նվազումն են:
Սվենսոնը նաև հաղորդել է, որ կանաչ օրակարգին անցնելու ծրագիրը Հայաստանում իրականացնում է Ստոկհոլմի շրջակա միջավայրի ինստիտուտը (SEI):
Այդ նախաձեռնության շրջանակներում Շվեդիան աջակցում է Հայաստանին կանաչ օրակարգի ուղղություններով քաղաքականության մշակման և իրականացման գործում, աջակցում է ազգային առաջնահերթությունների կատարմանը, ինչպես նաև մտադիր է նպաստել երկրի միջազգային պարտավորությունների կատարմանը:
Համաժողովին մասնակցել է նաև ՀՀ Ջրային կոմիտեի նախագահի տեղակալ Նվարդ Վարդանյանը: Նա նշել է, որ կանաչ օրակարգն ունի ավելի լայն նշանակություն և հիմք է հանդիսանում ինչպես տնտեսական կայունության, այնպես էլ ազգային անվտանգության, հանրային առողջության և պետական արդյունավետ կառավարման համար:
«Այդ գործընթացում ջրային ռեսուրսների պատասխանատու և ռացիոնալ կառավարումը մեր հիմնական խնդիրներից մեկն է: Հայաստանը հարուստ է ջրային ռեսուրսներով, սակայն մենք հասկանում ենք, որ կլիմայի փոփոխությունը, ջրային համակարգերի մաշվածությունը, ջրի դեֆիցիտի ավելացման ռիսկերը եւ դրա սպառման պահանջարկի աճը լուրջ մարտահրավերներ են ստեղծում բոլորիս համար: Այս պայմաններում մենք կարևորում ենք գիտական կազմակերպությունների, մասնավոր հատվածի և միջազգային կառույցների հետ սերտ համագործակցությունը", - ասել է Վարդանյանը։
