Արմինֆո. Հայաստանի վարչապետ Նիկոլ Փաշինյանը չի կարող մասնակցել մայիսի 28-29-ը կայանալիք ԵԱՏՄ գագաթնաժողովին: Այդ մասին նա հայտարարել է մայիսի 11-ին լրագրողների հետ զրույցում։
Նրա խոսքով՝ այդ ընթացքում ինքը, ինչպես նաեւ իր գլխավորած քաղաքական ուժը՝ ի դեմս "Քաղաքացիական պայմանագիր" կուսակցության, մասնակցելու է նախընտրական քարոզարշավին։ Վարչապետը հաղորդել է, որ դեռ ապրիլի 1-ին տեղեկացրել է Ռուսաստանի նախագահին մայիսի 9-ի միջոցառումներին մասնակցելու անհնարինության մասին: "Նաև տեղեկացրել եմ, որ չեմ կարող մասնակցել նաև մայիսի 28-ի միջոցառումներին ։ Երեկ զանգահարել եմ Ղազախստանի նախագահ Կասիմ-Ժոմարտ Տոկաևին և նրան նույնպես տեղեկացրել այդ մասին", - նշել է Նիկոլ Փաշինյանը:
Հիշեցնենք, որ Եվրասիական տնտեսական բարձրագույն խորհրդի հերթական նիստը տեղի կունենա մայիսի 28-29-ը Աստանայում: Ինչպես սպասվում է, նիստին Հայաստանը կներկայացնի փոխվարչապետ Մհեր Գրիգորյանը:
