Արմինֆո. ՀՀ-ում Բելառուսի Հանրապետության դեսպանատանը տեղի է ունեցել հայ-բելառուսական առևտրատնտեսական և ֆինանսական համագործակցության վերաբերյալ կլոր սեղանի շուրջ քննարկում: Դեսպանատան տվյալներով՝ միջոցառմանը մասնակցել են հայկական բիզնեսի ներկայացուցիչներ՝ «Բելգազպրոմբանկ»-ի կառավարման խորհրդի նախագահ Իրինա Պոտապովայի գլխավորած բելառուսական պատվիրակության գործարար այցի շրջանակներում:
Միջոցառման ընթացքում ՀՀ-ում Բելառուսի Հանրապետության գործերի ժամանակավոր հավատարմատար Ինեսա Կուդրուկը ներկայացրել է Բելառուսի արտահանման ներուժը, իսկ «Բելգազպրոմբանկ»-ի ղեկավարությունը ներկայացրել է Բանկի ներուժը որպես ունիվերսալ առևտրային բանկ, որը կենտրոնացած է փոքր և միջին բիզնեսին աջակցելու վրա՝ տրամադրելով առևտրային ֆինանսավորում և միջբանկային վարկեր:
Քննարկվել են տնտեսական համագործակցության ներկա վիճակը և հեռանկարները, այդ թվում՝ բանկային ոլորտում:
