Արմինֆո.ՀՀ փոխվարչապետ Մհեր Գրիգորյանը հեռավար ձևաչափով մասնակցել է Եվրասիական զարգացման բանկի խորհրդի տարեկան նիստին։
Ինչպես հայտնում է կառավարության մամուլի ծառայությունը, նիստի ընթացքում քննարկվել և ընդունվել են մի շարք որոշումներ, այդ թվում՝ Բանկի 2025 թվականի տարեկան և ֆինանսական հաշվետվությունների հաստատումը, շահույթի բաշխման մասին որոշումը, ինչպես նաև 2026 թվականի համար արտաքին աուդիտորի նշանակումը։ Հաստատվել են նաև Բանկի 2022-2026 թվականների ռազմավարության իրականացման արդյունքները և Բանկի զարգացման 2027-2031 թվականների նոր ռազմավարությունը։
Նշենք, որ Հայաստանում Եվրասիական զարգացման բանկի 2022-2026 թվականների ռազմավարությունն ուղղված է տրանսպորտային ենթակառուցվածքների, կանաչ էներգետիկայի, արդյունաբերության և գյուղատնտեսության զարգացմանը։ Հանրապետության համար նախատեսված ֆինանսավորման ընդհանուր ծավալը կազմում է 500 միլիոն ԱՄՆ դոլար։
