Արմինֆո.Հայաստանի իշխանություններն աջակցություն կցուցաբերեն ինտենսիվ այգիներ հիմնած այն ֆերմերներին, ովքեր բախվել են դեպի Ռուսաստանի Դաշնություն իրենց արտադրանքի մատակարարման սահմանափակումներին։ Այս մասին որոշումն ընդունվել է կառավարության հունիսի 25-ի նիստում։
Ներկայացնելով որոշման նախագիծը՝ ՀՀ էկոնոմիկայի նախարար Գևորգ Պապոյանն ընդգծել է, որ խոսքը վերաբերում է այն ֆերմերներին, ովքեր պետական աջակցության ծրագրերի շրջանակներում արտոնություններ են ստացել ՀՀ կառավարությունից։ Գործադիրի որոշմամբ առաջարկվում է 1 տարով երկարաձգել ներգրավված վարկերի մայր գումարի և դրանց տոկոսադրույքների վճարման ժամկետները։ Նախարարը նշել է, որ շատ ֆերմերների վարկերի վճարման ժամկետը կամ սպառվել է, կամ կսպառվի մինչև 2027 թվականի հուլիսի 31-ը։ Որոշման ընդունմամբ վարկի գումարի և դրանց տոկոսների վճարման արտոնյալ ժամանակահատվածը կերկարաձգվի, և մեկ տարվա ընթացքում ծրագրի մասնակիցները դրանց դիմաց չեն վճարի։
Նախարարը հիշեցրել է, որ ավելի վաղ համանման որոշում էր ընդունվել ջերմոցային տնտեսություններով զբաղվող շահառուների վերաբերյալ, սակայն այն ժամանակ աջակցության ծրագրի իրականացման ժամկետը սահմանափակվել էր վեց ամսով։ Ժամկետների միջև տարբերության առաջացման պատճառը տարվա ընթացքում ջերմոցային տնտեսություններում բերքի ստացման պարբերականությունն է։ Նոր ծրագրի շահառուն պետք է մինչև ընթացիկ տարվա սեպտեմբերի 1-ը դիմի ֆինանսական կառույց՝ ներկայացնելով Էկոնոմիկայի նախարարության տեղեկանքը ինտենսիվ այգու հիմնման ժամկետների մոնիտորինգի վերաբերյալ և Պետական եկամուտների կոմիտեի տեղեկանքը իրացված արտադրանքի ծավալների մասին։
Մեկ այլ նախաձեռնություն վերաբերում է առնվազն 10 հեկտար տարածքով նոր ինտենսիվ այգիների և 10 հազար խորանարդ մետր ջրի ծավալով ջրավազանների հիմնմանը։ Այս դեպքում իրավաբանական և ֆիզիկական անձանց կթույլատրվի իրականացնել ծրագրերն առանց կապալառուների ներգրավման՝ շահառուների կողմից ինչպես տեղական, այնպես էլ միջազգային աուդիտորական ընկերությունների իրականացրած աուդիտի արդյունքների ներկայացման պայմանով։
