Արմինֆո. Երկաթուղու կոնցեսիայի հարցը ՌԴ նախագահի հետ չի քննարկվել, սակայն մեր դիրքորոշումը մնում է նույնը․ դա մեր սեփականությունն է, և Հայաստանի Հանրապետությունը պետք է հնարավորություն ունենա այն օգտագործել այնպես, ինչպես նպատակահարմար է գտնում։ Այդ մասին հուլիսի 30-ին ճեպազրույցի ժամանակ հայտարարել է Հայաստանի վարչապետ Նիկոլ Փաշինյանը։
Նշելով, որ այժմ ընդդիմությունն ակտիվորեն տեղեկատվություն է տարածում Հայաստանում թանկացումների մասին, վարչապետը չի բացառել, որ այն, ինչ 30 տարի շարունակ մեր երկրում անվճար է եղել, դառնա վճարովի: Մասնավորապես, նրա ասելով, Հայաստանի Հանրապետությունը կարող է տարեկան 2 մլրդ դոլար խնդրել վարձակալության դիմաց։ Հարցին, թե արդյոք ակնարկն առնչվում է երկաթուղուն, կառավարության ղեկավարը պատասխանել է, որ իր խոսքում ակնարկ չկա, քանի որ հստակ ասում է․ երկաթուղին Հայաստանի Հանրապետության սեփականությունն է, և այլ տարբերակներ այստեղ լինել չեն կարող:
"Ամեն դեպքում, մենք ցանկանում ենք բարեկամաբար լուծել այդ հարցը, բայց դե-յուրե կարող են հարցեր առաջանալ, և եթե համաձայնություն ձեռք չբերվի, կգնանք արբիտրաժային դատարան և կքննարկենք", - ասել է վարչապետը:
Հիշեցնենք, որ "ՀԿԵ" ՓԲԸ-ն "Ռուսական երկաթուղիներ" ԲԲԸ-ի 100% դուստր ընկերություն է: 2008 թվականի փետրվարի 13-ին Երևանում "Ռուսական երկաթուղիներ" ԲԲԸ-ի և Հայաստանի Հանրապետության միջև ստորագրվել է կոնցեսիոն պայմանագիր՝ Հանրապետության երկաթուղային տրանսպորտի համակարգը "ՀԿԵ" ՓԲԸ հավատարմագրային կառավարմանը հանձնելու մասին:
Պայմանագրի համաձայն, կոնցեսիոն կառավարման ժամկետը 30 տարի է ՝ կողմերի փոխադարձ համաձայնությամբ աշխատանքի առաջին քսան տարուց հետո ևս 10 տարով երկարաձգելու իրավունքով։ "ՀԿԵ" ՓԲԸ խնդիրների մեջ են մտնում ՀՀ երկաթուղու ենթակառուցվածքի արդիականացումը, Հայաստանին սահմանակից պետությունների հետ համագործակցության զարգացումը, ներհանրապետական և միջազգային ուղևորափոխադրումների և բեռնափոխադրումների զարգացումը: Ընկերության կողմից իրականացվող ներդրումների չափը կազմում է 572 մլն դոլար: "ՀԿԵ" ՓԲԸ-ն իր գործունեությունը սկսել է 2008թ. հունիսի 1-ից:
Հիշեցնենք, որ ս. թ. մարտի 26-ին ՀՀ վարչապետ Նիկոլ Փաշինյանը հաղորդել էր, որ Երևանը դեմ չէ հանրապետության երկաթուղիների կառավարման կոնցեսիայի փոխանցմանը ղազախական ընկերությանը, եթե այդ հարցում համաձայնություն ձեռք բերվի Ռուսաստանի հետ: Դեռևս այս տարվա փետրվարին Փաշինյանը սկսել էր բարձրացնել ռուսական կոնցեսիան երրորդ բարեկամ կողմին հանձնելու անհրաժեշտության հարցը ։ Որպես տարբերակ՝ նա նշել էր Ղազախստանը, ԱՄԷ-ն և Կատարը ։ Նա դա պատճառաբանել էր այն հանգամանքով, թե, իբր, Երևանը կորցնում է իր մրցակցային առավելությունները, և երկաթուղու հարցը պետք է լուծել Ռուսաստանի հետ "բարեկամության, եղբայրության տրամաբանությամբ"։
